政壇：廖長江專注議會減公職
成為議會「新丁」嘅中總代表Martin廖長江本來已請咗位助理幫手，可惜到依家都仲未正式返工，所以佢形容自己名副其實係「獨立人士」喎。各議會新丁甫入議會，已見識長者生活津貼計劃上嘅行政同立法對戰，Martin日前出席梅州聯會活動時坦言，上任至今覺得爬得好辛苦，又話未來為咗專注議會工作，或會減少公職喎！
Martin又話自己冇返過鄉下，相信未來有機會都會返去行吓。當被問及識唔識講客家話，佢坦承自己係識聽唔識講。話時話，鄉親之間最鍾意用家鄉話溝通，唔知佢第時返家鄉前會否學番幾句家鄉話傍身呢？
