政壇：慢必識男仔要助手幫眼
人民力量嘅同志議員「慢必」陳志全尋日出席一個同志活動時大爆，新民黨主席葉劉淑儀自稱黨內有好多同事都係「攣」嘅，仲化身「媒人」話介紹其中一個男同事畀慢必識，但直到依家仲未有下文。不過，始終都要睇吓係咪合眼緣，慢必笑笑口話，可能會叫助手幫手睇吓個男仔係乜嘢樣，或者影張相「過吓目」先喎。
多個同志團體將於下月十日舉行同志大遊行，爭取同性戀者喺工作環境不受歧視同擁有相同待遇，大會預計有三千人參與，仲呼籲參加者當日穿着代表不同職業嘅服飾。慢必將會擔任活動大使，呢次將會係佢喺香港首次參加同志遊行，佢以前嘅男朋友因怕畀人知道係同志身份，所以佢一直冇參與。
慢必將擔任一個同志遊行嘅活動大使。