淘汰殘舊柴油車 最怕兩頭唔到岸

空氣污染係香港嘅頑疾，搞極都唔掂，無計可施之下，政府尋日刊憲收緊發電廠排放二氧化硫、懸浮粒子及氮氧化物等限制，預計明年底生效喎。嗱，你話咁有冇用吖？即係咁，遲到好過冇到，收緊廢氣排放，市民梗係舉腳贊成喇，但如果當局認為咁就可以改善空氣，換來藍天白雲，就實在太天真嘞。

冇錯，發電廠係導致空氣污染嘅主要元兇，限制排放固然有必要，不過咁，汽車排放嘅廢氣都唔少o架，咁又點算呢？其實，世界衞生組織早就將柴油車所釋放嘅廢氣定義為致癌物，而喺香港，家陣仲有唔少殘殘舊舊嘅柴油車周街走，有乜法子唔搞到烏煙瘴氣吖。環境局局長黃錦星就話嘞，現時八成空氣污染物來自老舊柴油貨車，未來政策方向係訂立貨車退役時限，計劃參考內地做法，將十五年以上柴油貨車叮走，冇得續牌。佢仲話，當局將會雙管齊下，一方面向貨運業界提供經濟誘因鼓勵舊貨車退役，另一方面迫令車主更換環保車喎。

計太一叮話齋，連內地都唔准十五年以上貨車行走，香港假假地都係國際都會，冇理由仲落後過內地啩，所以當局計劃逐步淘汰殘舊柴油貨車，都唔係冇理由嘅。問題係，物流運輸業係香港主要經濟支柱之一，當局淘汰舊車，可能打破好多人飯碗，千祈要小心衡量吖。

唔係講笑o架，目前全港柴油商用車輛（唔包括專營巴士同特殊用途車輛）超過十二萬架，近三成即三萬五千幾架車齡超過十五年，當中逾九成係柴油貨車。眾所周知，更換環保貨車費用不菲，閒閒地要幾十萬，唔係個個車主都負擔得起，咁又點解決呢？牽一髮動全身，如果三萬架舊貨車同時被叮走，受影響嘅唔止車主，仲有從事物流運輸業嘅無數打工仔，當局為保藍天，隨時得不償失，好心做壞事。

再講吖，家陣油價同人工係咁飆升，經營成本不斷增加，業界艱苦經營，就算有能力換車，成本最終又係轉嫁到消費者身上，令競爭力進一步受損，再咁落去，物流運輸業呢條經濟支柱遲早折斷嘅咋。

總而言之，空氣質素要改善，車輛廢氣要減少，呢個大方向冇人話唔啱，但絕對唔可以操之過急，更加唔可以損害業界利益，如果唔係，搞到兩頭唔到岸，到時藍天依然冇影，而打工仔連飯碗都冇埋，咁就大件事喇，叮！