SUN奇古怪：Sun潮語：【血拼】

早輪有報道指，有一班強國遊客喺法國巴黎老佛爺百貨Galeries Lafayette中踎地食飯盒，盡顯強國本色。路過的法國人及其他外國遊客，都為之側目，喺優雅堂堂嘅大百貨公司中，空氣本來應該係充滿channel及Armani呢啲高級香水氣息，又或者係浪漫而漂亮嘅法國富有人家，身上所散發嘅布爾喬亞自然體香。誰不知突然傳嚟一陣格格不入嘅中式飯香，唔明白中國文化「民以食為天」嘅老外，肯定大驚小怪大呼：「Oh…NO！」老外有所不知嘅係，強國成十三億人，一出世就要同人爭到頭崩額裂，就連去商場購物，都會用「血拼」嚟形容！

「血拼」係近年流行嘅一句國內潮語，「血拼」其實係自英語Shopping嘅普通話拼音。點解連形容購物，都要咁血腥？又血又拼咁，呢個當然同國情有關，你諗吓，以強國自由人嚟香港狂掃奶粉尿片益力多檸茶嗰種澎湃，啲貨有時真係手快有手慢冇o架！加上內地劣品假貨充斥，仲要唔係下下有自由出國掃貨，一有機會就梗要瘋狂搶奪，一分鐘都唔可以浪費，就算大打出手，頭破血流都在所不惜，所以「血拼」這個潮語，絕對能夠帶出具中國特色嘅購物主義，非常入型入格！

近年，好多國家都對強國遊客敬而遠之。尤其近年強國經濟傲視全球，部分人民富起來，喺中國買唔到咩？就放眼世界，「血拼」全球。但係民族整體質素又跟唔上經濟發展，搞到其他國家見到強國人嗰種財大氣粗，罔顧公德，有錢大乜晒嘅態度，唔好話外國人，香港都怕咗佢哋啦！不過咁，我國係會用血肉嚟築起長城，用「血」去「拼」心頭好，亦都好符合強國邏輯。