政壇：搞搞政：吳慧儀吳秋北為基層睇實積金

強積金「半自由行」下月實施，當局可能預計投訴個案有上升趨勢，尋日宣布將強積金計劃上訴委員會嘅規模擴大，由現時五名成員增加到九名，仲打破以前只用專業人士嘅慣例，加入勞工界別成員包括工聯會理事長吳秋北同埋勞聯副主席吳慧儀，令委員會有多啲打工仔嘅聲音，充分體現新政府平衡各方利益嘅風格。

以往強積金計劃上訴委員會嘅委員基本上由專業人士擔任，例如會計師左龍佩蘭、律師鄺鳳萍同保險界嘅朱永耀，但今次新增嘅四名成員，有一半都係來自勞工界。

吳慧儀尋日話因為可以加入打工仔嘅聲音，令到業界明白打工仔面對嘅問題，所以佢二話不說就應承加入。佢又話相信積金局宣傳做得好嘅話，應該唔會太多投訴，亦都唔希望太過忙，因為咁樣代表半自由行漏洞多。吳秋北都話歡迎當局嘅做法，認為唔會好似以前咁只得業界嘅聲音，令委員會更加有信服力。

此外，政府委任咗退休上訴庭副庭長司徒冕做主席，副主席就由資深大律師石永泰連任，所有委員嘅任期由下月一日生效，為期兩年。