政壇：唐偉章籌款鬥快手
政府重新啟動配對補助基金計劃，勢掀起各間大學爭相向大孖沙籌款嘅競賽。啱啱獲政府宣布自一四年元旦起續約五年嘅理工大學校長唐偉章，即刻發力籌款，率先響應嘅係前仁愛堂主席兼七星控股主席Fiona張心瑜，佢捐助四百萬元支持理大長遠發展，獲理大將學生宿舍演講廳以佢嘅名命名。以往商界巨額捐款，多數流向港大等名牌學府，難怪唐校長要鬥快喇！
張心瑜演講廳日前舉行命名及揭幕儀式，出席嘅城中名流眾多，包括前政務司司長唐英年母親唐尤淑圻、廣東社團總會主席王國強等人，仲有大學顧問委員會主席鍾志平。Fiona係香港南京總會主席，又做過保良局總理，交遊廣闊。唐偉章唔止公開呼籲大家齊齊捐錢撐理大，又趁機帶嘉賓參觀學生宿舍，認真用心良苦。梗係啦，政府配對基金可令大學籌到嘅善款增加一倍，多勞多得嘛。
張心瑜（中）率先捐錢畀理大，唐偉章（右二）同鍾志平（右一）笑容滿面。左起為張心瑜囝囝同母親。