政壇：林D9唱好香港博加分

選擇急流勇退、喺任期屆滿後放洋去英國牛津大學讀神學嘅前政務司司長「林D9」林瑞麟，日前應邀喺牛津大學發表演說。

呢次係佢「退休」後首次出席嘅公開場合，演辭內容一如既往，大力唱好香港，堅持《基本法》同一國兩制喺香港成功落實。佢亦話香港未全面普選，皆因港英殖民地政府太遲推直選，就算係《中英聯合聲明》亦冇提到普選。反而係中央政府回應港人訴求，先會將普選加入《基本法》。

佢又話特區政府喺擴大選民基礎方面做咗好多工作，包括一○年政改方案，新增「超級區議會」議席， 令全港市民一人有兩票，選民人數比末代港督彭定康九五年嘅「新九組」方案仲要多。唔單只咁，佢喺演辭中仲暗批肥彭，話肥彭九二年上任後曾訪問加拿大，林D9話自己當時正擔任香港駐多倫多經濟貿易辦事處處長，佢話肥彭聲言支持香港民主化，係博取當地政客同媒體歡迎。

演辭中亦提及香港法治同經濟發展，據講好多觀眾都聽到點晒頭。林D9讀神學都不忘交心，係咪為將來仕途鋪路？政界一直盛傳佢明年三月有機會做全國政協常委，今次佢唱好香港唔知會否成功加分呢？