政壇：阿Cyd被封殺兩大皆空

早前都講過，工黨立法會議員Cyd何秀蘭企圖挑戰內務委員會副主席一職，但慘被建制派聯手封殺。尋日內會投票選出新一屆政府帳目委員會七位成員，原先雙方傾好各自派人出選，點知人民力量黃毓民中途殺入爭位，建制派隨即變陣，寧願要毓民加入委員會，都要繼續封殺競逐連任嘅阿Cyd，搞到阿Cyd低票落選。

做咗帳委會兩年委員嘅阿Cyd，最後以二十五票不敵攞到三十四票嘅黃毓民連任失敗。佢話晏晝開泛民主派飯盒會時已知建制派唔會投票畀佢，又話自己素來對規程問題非常執着，得唔到建制派支持係理所當然。

泛民鬼打鬼

不過成件事又唔怪得晒建制派嘅，事關如果泛民主派可以同人民力量傾掂數，相信建制派一定唔可以成功封殺阿Cyd，而莫乃光之前亦唔會失落資訊科技及廣播事務委員會副主席個位啦。搞成咁都係因為泛民鬼打鬼！至於帳委會正副主席，分別由石禮謙同謝偉俊出任，其餘委員包括吳亮星、陳克勤、梁繼昌同梁家傑。

再睇吓立法會選議員做中大校董。話說建仔陳克勤上屆當選後爆出一句「搓our breast」後出任中大校董，結果被中大一眾師生鬧爆佢英文差就唔好學人做校董，今屆佢就讓畀黨友葛珮帆，其餘兩位校董係富貴黨張宇人、新民主同盟范國威，人民力量陳志全就不敵范國威而落敗。點解有兩名泛民議員爭？咪又係傾唔掂數囉！

港大校董全部都係自動當選，當中最矚目嘅莫過於曾鬧出卡片串錯字風波嘅建仔鍾樹根，事後又惹來網民議論紛紛，擔心佢睇唔明港大校董會嘅英文開會文件。其餘四名校董包括石禮謙、謝偉俊、涂謹申同葉建源。