立會屆屆懶蟲多 爭拗年年嘆奈何

開講有話,新人事,新作風,新一屆立法會已經開鑼,你估可唔可以帶來新氣象,唔使再畀人叫「垃圾會」?

正所謂,年年歲歲花相似,歲歲年年人不同。立法會吵吵鬧鬧,烏煙瘴氣,年年如是,屆屆不變,大家都不寄予厚望o架嘞。不過咁,今屆總算有少少唔同,臭名昭著嘅四大懶蟲終於散檔,話唔定真係可以令人耳目一新o架。

嗱嗱嗱,議會懶蟲真係年年搞臭立法會個名o架。有團體發表監察報告,就上屆立法會議員最後一年嘅考勤表現派成績表,結果四大懶蟲又被點名狠批。其中最鼎鼎大名嗰個就係「三點不露」嘅李國寶嘞,輕易奪得在場不投票最多嘅懶王寶座,呢個都算係為佢度身訂造嘅恥辱獎咯。

至於其他三大懶蟲咯喎,一樣令人嘆為觀止。劉皇發被指廿一年來無提過任何動議,霍震霆被評為全年表現最差議員,雙雙受到譴責。而黃宜弘就被揭全年零質詢、少發言、少動議,整體表現不合格。

講到呢度,太一叮不禁悲喜交集。悲嘅係立法會懶蟲當道,本來職責係監督政府,結果反而被人監督番轉頭,年年被人鬧到七彩,屆屆被人炳到開花,佢哋唔知醜,市民都戥佢哋醜啦。喜嘅就係四大懶蟲中除咗劉皇發之外,其餘三人都眾望所歸,無得留低。唔該新一屆議員勤勤懇懇,認真做事,議會傳統就話承傳落去啫,懶蟲陋習唔需要承襲落去o架,一於扔落垃圾崗喇!

話時話,立法會如果想一洗頹風,議員固然唔可以做懶蟲,更加唔可以做破壞王,終日掟蕉爆粗,吵吵鬧鬧,有破壞,無建設。回歸十五年,議事堂唔係議事,而係嗌交,代議之士唔係代民發聲,而係阻撓施政,咁搞法,香港點會好呀?民生點會改善呀?市民點會安居樂業呀?

係人都知,前朝政府留低大堆施政爛攤子,新政府啱啱上場,能唔能夠撥亂反正,可唔可以興利除弊,好大程度就睇立法會。好似長者生活津貼咁吖,下星期向立法會闖關申請撥款,如果議會又搞政治鬥爭,萬一搞到議案觸礁,老人家一定唔會放過你哋o架!

一句講晒,立會屆屆懶蟲多,爭拗年年嘆奈何。各位議員,請好自為之啦,叮!

第一手消息請下載on.cc東方互動iPhone/iPad/Android/Windows Phone Apps