SUN微博：打橫嚟講：諾貝爾獎應屬於中國人的！

今屆諾貝爾文學獎頒咗畀莫言，雖然有好多人話係實至名歸嘅！但我覺得，我祖國經濟強盛，人才濟濟，只得一個靠「老作」嘅書生獎，係唔夠嘅！係不能體現我國偉大嘅！係唔夠體面嘅。

以今時今日，中國應該全數擸晒你瑞典佬呢六個諾貝爾獎，才算公平！

嗱！「化學獎」，我國同胞發明嘅「人造雞蛋」、「地溝油」、「三氰奶粉」、「鞋皮再生藥囊」……不在話下，連失事「動車」，能於半晝時間內，將之解體，全屍埋入地底，要幾化學有幾化學呀！

「經濟獎」，世界上，有邊個國家嘅任何一個村長，只要畀人揭發佢貪污，一定可以喺佢屋企床下底，搜出一億幾千萬現金o架？佢哋銀能力勝過格林斯潘多多聲啦！

「醫學獎」就更唔使講啦！中國名醫隨時可以令偉大的領導人「死去活來」o架！咁都不能獲獎，就擺明有外國勢力阻撓囉！

「物理學獎」唔畀中國，就證明班評委諸公唔識貨也。內地有個女太極師傅，能「隔空打人」，只要佢一發功，站在她身旁的人，總會飛開幾米外；有記者親自上陣試試，女師傅運勁一發，記者毫無感覺之際，佢身後邊一個太極弟子，竟大叫一聲，成個彈後十幾呎，呢啲神功都唔畀個獎佢，如何服眾呢？

「和平獎」就梗係聽香港特首梁振英話，應頒畀偉大嘅藍圖設計師鄧小平啦！無佢，中國點會維持穩定咁多年呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot