政壇：政商定格：張永霖夫婦加國歎美酒
港大專業進修學院校董會主席Linus張永霖同太太Silvia早就當加拿大係半個家，佢哋早前就去咗湖畔小城基隆那（Kelowna）避暑，當地夏天氣候怡人，係名人度假天堂。Silvia仲約埋喺香港「難得一見」嘅名人好友——前行政會議成員范鴻齡夫婦，一齊參觀基隆那嘅葡萄園同酒莊，喺湖光山色下盡情品嘗美酒佳餚，如置身世外桃源。
Linus返港後就忙於打理明德學院，佢身兼該校校董會主席，正努力為學院籌款。佢狂碌人情卡搵好友捐錢，Silvia就請纓做「三合一」助手 ，兼任老公秘書、私人助理同司機。
