政壇：政商定格：陳曦齡升呢做嫲嫲
名醫Helen陳曦齡舊年以健靈慈善基金主席身份首辦「慈善單車馬拉松」活動，反應熱烈。今年再接再厲，仲拉埋細仔Ryan謝天澤出嚟做宣傳，認真母子齊心。Helen笑言，自己踩單車技術一般，所以都係由Ryan代表出賽。
Helen仲自爆已經做咗嫲嫲，事關大仔謝天承同韓籍太太誕下龍仔，依家已四個月大。上月中秋期間，佢同老公謝德富、Ryan去咗杭州錢塘江睇「一線潮」，當日晨早八點已經去霸定靚位，望穿秋水等到中午，「一線潮」曇花一現就完咗。
近日美容集團發生毒針事故，佢坦言始終都係天然美容最好，所以佢每朝起身會做柔軟體操，三餐定時定量加水果，健康就係咁簡單。
陳曦齡（右）同細仔謝天澤齊宣傳慈善單車馬拉松活動，笑容好一致。