政壇：搞搞政：阿富卿姐罵戰鬼打鬼

白鴿黨代主席劉慧卿同已退黨嘅鄭家富本來係同門師兄妹，但自一○年政改方案事件後就各走各路，點知尋日仲爆發罵戰，簡直係鬼打鬼呀！

話說卿姐出席阿富主持嘅數碼電台節目時，講到白鴿黨未來要檢討工作方向時，卻被問起一○年去西環談判同支持政改方案嘅事。卿姐話如果時光倒流，佢都會喺政改方案入面投贊成票，因為佢個人贊成溝通，而有啲市民都係因佢哋嘅決定而支持白鴿黨，仲話就算政府喺○五年提交政改方案上立法會，相信當時嘅白鴿黨都會支持添。

跟住阿富突然拍枱咁狂鬧卿姐逾五分鐘，又話卿姐冇資格咁講，因為佢喺○五年時同白鴿黨全無關係，依家亦冇資格做黨嘅代主席。卿姐亦火起反擊，一邊鬧番阿富、一邊執起手袋走人：「全部都係你講晒啦，我覺得好無謂囉，參加呢啲節目好冇意思、冇興趣……呢啲叫言論自由呀？早抖啦！完全好混帳！」

卿姐走咗之後，阿富繼續質疑卿姐接受唔到批評，點做立法會議員。另一主持人唔單止叫阿富要客觀啲，畀時間卿姐回應，更加唔應該拍枱，仲話佢已非白鴿黨成員，所以冇資格批評卿姐係咪適合做黨代主席。點知阿富完全失控繼續係咁鬧，皆因自己太痛心，所以控制唔到啲火喎！