教育變成生意 學府淪為學店

古人話，大學之道，在明明德，在親民，在止於至善。教育嘅目的係要令學生明心見性，辨事理，分曲直，係好神聖嘅百年大計嚟o架。殊不知今時今日嘅香港，教育居然淪為一門生意，各大院校見錢開眼，濫收超收，「有教無類」變成「有錢無類」，問你服未。

唔係講笑o架，嶺南大學兩間自資嘅社區學院同持續進修學院，舊年只係收咗一千九百名學生，今年竟然增至五千三百人，超收近兩倍，搞到學校人山人海，水洩不通，設施不勝負荷，學生幾乎要自己擔櫈仔返學，好似內地落後地區嘅小學生，講起都失禮。校方無計可施咯喎，除咗削足適履，減少學習時數，仲安排學生周圍上堂，有啲喺夜店隔籬，有啲喺街市樓上，簡直無奇不有。唔怪得有人話，再咁落去，香港遲早返番去幾十年前嘅天台小學年代都似。

嗱，尋日又有學生拉橫額到立法會請願，除咗要求議員介入調查，亦要求政府好好監管各院校嘅自資課程。冇錯嘞，無咁大個頭就唔好戴咁大頂帽，學校瘋狂收生，逼爆校園事小，影響教學質素，誤人子弟事大，點到政府唔理o架。

講嚟講去，一切都係錢作怪。正如有人話齋，超收令學校財源廣進，唔收就笨。呢啲大學話就話搞博雅教育，其實係搞博錢教育就真。呢，啱啱獲續約五年嘅嶺大校長陳玉樹以「個人及健康」理由宣布辭職，姑勿論係咪同超收事件有關，嶺大爆出咁大醜聞，搞到學生怨聲載道，身為校長嘅佢唔多唔少都有啲責任啩。

即係咁，大學唯利是圖固然應該反省，而港府對大專院校冇監冇管，放任自流，更加難辭其咎喇。副學士係董建華政府留低嘅蘇州屎，早就有口皆悲，而曾蔭權政府唔單止冇好好檢討，仲好大喜功，大力鼓吹所謂教育產業，搞到大學紛紛將教育當成財路，將學生當成搖錢樹，有乜法子唔烏煙瘴氣，七國咁亂吖。最好笑嘅係，唔少院校為咗招徠內地學生，竟然將貨就價，求其讀一年就可以得到碩士學位，你話喇，佢哋究竟係搞教育，定係做生意？

開講有話，十年樹木，百年樹人。香港教育質素本來唔差，大學排名一向唔低，點知依家搞到教育變成生意，學府淪為學店，孔夫子話齋，吾不欲觀之矣，叮！