SUN微博：打橫嚟講：不該「×街」的Poor Guy

新民黨主席葉劉淑儀喺電視訪問直播時，人快口快，話「我喺街上，有人叫過我『仆街』……年輕人一見到我就叫我『仆街』」，佢連講兩次「仆街」，是想表達做議員，要捍衞具爭議性嘅話題時，其壓力也不比做官的小啊！

訪問直播翌日，香港報章轉述葉太之言，有原文直錄，照寫「仆」字，亦有以「×」代替，顧忌「仆街」一詞乃係粗口，要用符號代之！另外，葉太對自己「真情流露」而「爆粗」，在fb裏主動致歉！

其實，「仆街」一詞，並非「粗口」，因家陣「粗口」的定義那些「粗言穢語」，定必含與「性」有關的字詞，例如性器官及性動作。「仆街」，只係一個咒罵語，字面意是指「一個人仆倒街頭」而已！

「仆」，本作「向前跌倒」解，文讀「付」，白讀「puk」。「仆」，不一定係衰嘢，例如「仆心仆命」（真心認真）去做嘢，又或「前仆後繼」上戰場，只不過，廣東的「罵文化」裏，咒人家「去死」，甚至「不得好死」，用了這個「仆街」一詞啫！

何解「仆街」是「不得好死」呢？哦！原來，中國人之「死文化」，是「一個人安詳地死在家中」，並要有子孫圍在床邊送終，才算得是「好死」。

反過來，一個人在街邊仆低（喻作瓜老襯），又無仔女喺身邊服侍，是件非常大不吉之禍事，所以，罵人「仆街」，其實，背後暗喻——毒咒也！

報章用「×」代替「仆」字，可作隱惡之表現，但我哋同時也應了解多些中國傳統文化，「不該」做個文盲「poor guy」，無端端仆住去道歉！　

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府