政壇：政商定格：周國豐開舖專賣豪華床
社交界名人Brandon周國豐三個月前開店做英國豪華睡床Vi-Spring代理，成為律師工作外嘅第一盤生意。日前喺《茶花女》預演酒會見到佢，佢話呢個牌子已有過百年歷史，連英國皇室成員都係捧場客，最貴一套睡床要價一百萬元添！
講起做呢盤生意嘅原因，佢話自己經常瞓得唔好，所以成日趁出遊周圍試床，有次試瞓呢個牌子，感受迥然不同，遂決定做香港代理。佢兩個囝囝嘅BB床都係度身訂造，夜晚瞓得特別香甜喎！佢又透露已另開一間唔同品牌嘅床店，唔排除日後唔撈律師呢行添！同場嘅太子珠寶主席Jimmy鄧鉅明話，用幾十萬買張床好似好誇張，但係諗深一層，人生有三分之一時間喺床上，攤開嚟計就唔係特別貴，所以佢都用咗四十幾萬元買張床。
鄧鉅明（右一）幫襯周國豐（左一）代理嘅豪華睡床，希望瞓得好啲。左二及三為佢家姐朱鄧麗萍及中總會長蔡冠深太太蔡關穎琴。