政壇：搞搞政：民意支持推「老津」審查

長者生活津貼嘅討論進入最後直路，支持同反對設立資產審查陣營嘅角力日漸白熱化，據聞政府內部仲有秘密武器喺手，就係民意戰必備嘅民意調查。

民意戰正在上演，據聞政府正採取「多條腿走路」嘅方法，首先動員部分社福界巨頭同學者出嚟撐長者生活津貼，有建制派中人更特別指出，擁有泛民背景嘅白鴿黨「大腦」羅致光同公文袋鄭宇碩罕有地站在同一陣線撐政府，絕對難能可貴，甚至幫政府喺呢場民意戰爭番唔少分數。

而政府內部亦密切注視民意變化，消息指長者生活津貼不撤銷資產審查係政府嘅底線，原因係政府內部民調顯示，支持長者生活津貼設資產審查嘅比率大比數拋離撤銷資產審查，但最後關頭係咪會將之公諸於世就未有定案。

相反，一向愛做民調製造民意嘅泛民主派為何至今未有動作，有知情人士相信係別有苦衷，皆因民意今次唔係企喺佢哋嗰邊，佢哋惟有繼續向政府發動「口水戰」，期望民意轉向。