政壇：葉劉卿姐撈亂新丁同事
立法會公務員及資助機構員工事務委員會尋日召開首次會議選正、副主席。話說商界（第二）議員廖長江舉手提名新民黨葉劉淑儀做主席，點知代為主持會議嘅白鴿黨劉慧卿同秘書細細聲講咗兩句之後就話︰「潘兆平議員提名葉劉淑儀議員。」坐喺較後位置、冇舉到手嘅勞聯議員潘兆平即刻話：「我喺度喎。」呢個時候劉慧卿先知自己叫錯名，惟有話：「唔好意思，我同秘書都搞錯咗。」
葉劉喺冇競爭下自動當選委員會主席後，輪到選副主席，工聯會嘅鄧家彪舉手和議潘兆平做副主席時，葉劉就將鄧家彪個名叫咗做同屬工聯會嘅「郭偉強」，真係尷尬。咁都撈亂，睇嚟新、舊議員真係要多啲聯誼吓，否則自己同事都唔認得就唔係幾好啦！
廖長江（圖）同潘兆平確有幾分似。（資料圖片）
潘兆平