政壇:陸恭蕙上任連執兩公司

上任個多月嘅環境局副局長陸恭蕙,除忙於處理環保工作外,原來亦忙住搞執笠。環境局尋日將佢嘅利益申報資料上網,證實佢已辭任被指有利益衝突嘅思匯政策研究所所有職位。

申報書顯示佢原來仲持有兩間公司嘅股份,其中一間係佢全資擁有嘅英屬處女島註冊嘅投資公司,但已有一段時間冇運作,現正進行清盤程序。另一間係名為「寶時顧問有限公司」嘅公司,佢持有一半股權,另一半就由佢媽媽、亦即太古洋行首任買辦莫任揚後人莫綺萍持有,同樣搞緊清盤。

佢雖然有個女,但係喺外國搵代母生嘅,申報書寫佢現時並無配偶。佢擁有嘅物業唔多,只有一個喺中西區嘅自住單位,其他聯繫方面就有「關懷愛滋」贊助人、聖保祿學校校友會同外國記者協會成員等,唔算複雜。

第一手消息請下載on.cc東方互動iPhone/iPad/Android/Windows Phone Apps

陸恭蕙一連執咗兩間公司。(資料圖片)