政壇:學明兩罪辣慶鄉親

回復平靜冇耐嘅新界鄉議局,近嚟又湧現不滿聲音喇。不過今次矛頭就唔係指向鄉議局主席劉皇發,而係進身行會成員嘅副主席張學明。事緣有部分鄉委會成員認為,學明「升呢」做咗行會成員後,似乎從未開過聲撐僭建,冇將新界人聲音帶入行會,同以前發叔嘅做法好唔同。睇嚟張學明一日唔拆掂班鄉親,都有排頭痛。

自從張學明入咗行會,班鄉親就好唔滿意,覺得張學明冇幫新界人講好說話,尤其喺村屋丁屋僭建問題上面,佢更加係粒聲唔出,就係呢件事已令班鄉頭好大怨氣。另一牙齒印就數番個幾月前嘅立法會選舉,部分鄉親覺得佢身為鄉議局中人,竟然手指拗出唔拗入,寧願撐建仔嘅葛珮帆都唔撐鄉事派邱榮光,同拆自己祠堂冇乜分別。

難取代發叔地位

所以近幾個月部分鄉親都隱約浮現一種「倒張」風潮,好似舊時發叔做咗行會成員後,有大批鄉頭自動波幫發叔搞慶功宴,擺番幾十圍熱熱鬧鬧咁,但今次張學明做咗行會成員,似乎冇乜人有意幫佢搞慶功,就算親張學明嘅鄉親建議擺番幾圍酒賀吓佢,都冇乜人和議。

除咗冇人幫佢慶祝,據聞佢連自己屋企僭建嘅舊聞,都被傳媒重提舊事,插佢過咗成年都未拆僭建物,擺明無心拆屋。我哋尋日問咗張學明,佢話已跟足程序入紙申請拆屋,只係政府未批喎。如果呢股「倒張」風氣蔓延落去,睇怕佢都好難取代發叔做鄉議局一哥。

第一手消息請下載on.cc東方互動iPhone/iPad/Android/Windows Phone Apps

設計圖片