治癌針藥不除菌 私醫監管病象多

大菌食細菌，細菌當補品。冇錯，細菌同人一樣有好壞之分，有啲細菌的確對人體有益，但有啲細菌係對人體有害嘅，唔止唔係補品，仲會傷身甚至攞命添。市民打美容針被惡菌入血，居然搞到失去寶貴性命就係例子。所以咯喎，大菌與細菌，唔係人咁品，係唔應該掉以輕心嘅！

又大菌，又細菌，又益菌，又惡菌，太一叮想講乜呢？唔通又有醫學美容集團被揭發亂咁為顧客打針草菅人命？唔係，不過都差唔多咯，今次係私營醫療機構被踢爆喺不合衞生環境處理治癌針藥，被指搵病人嘅命仔較飛，叮！

香港醫院藥劑師學會爆料，現時十九間私營醫療機構分別喺商廈為病人提供化療靜脈輸注服務，當中只有一、兩間設有俗稱「安全櫃」嘅密封式設施調配抗癌藥，但始終未達到國際無菌標準。咁即係話，針藥存在被細菌污染風險，病人醫病不成，仲隨時病多幾錢重添。

仲有呀，治癌私醫欠監管，面對風險嘅唔止病人。藥劑師學會係咁講嘅，抗癌藥釋出嘅氣霧可令人致癌或者誕下畸胎，醫療機構喺呢啲非專門設計作醫療用途嘅商業大廈進行高風險醫療程序，對醫護人員同商廈其他人士嘅健康一樣構成威脅，促請政府規管。

嗱嗱嗱，太一叮唔係細菌專家，亦唔係癌症專家，但係聽完藥劑師學會咁講，就覺得治癌私醫無王管嘅情況的確好令人擔心。喂，做植牙手術都要喺無菌環境進行啦，治療癌症嘅高端醫療程序居然求其喺一間商廈單位進行，兒唔兒戲啲呀？萬一又發生打針引致惡菌入血嘅奪命慘劇，邊個負責呀？

講嚟講去，都係港產官僚疏懶累事。醫學美容缺乏監管，治癌私醫又唔管，既然官僚大食懶咯，市民咪要食驚風散囉，處處面對惡菌毒針威脅。

講到呢度，真係唔叮爆曾蔭權個鎯鎯都唔得！就係因為呢個過氣特首日日發醫療產業嘅春秋大夢，所以對私營醫療集團放任自流，不聞不問，卒之搞到家陣亂象叢生，危機處處。家陣貪曾呢隻官場大病菌被掃走咗嘞，希望其他官場小病菌可以洗心革面，唔好再害人害物啦。

一句講晒，當局快快糾正醫療亂象，仲要快快整頓懶官，叮！