SUN微博：黐筋網相：啞視節目永不倒
Sun微博多次報導過啞視嘅「豐功偉績」，其實並唔係玩針對，就好似呢張網民截圖就係明證。原來啞視無咩廣告，日日唱「萬里長城永不倒」都唔掂喇，因此搞出個自吹自擂嘅廣告。點知網民驚見家傳戶曉嘅《魚樂無窮》，竟然都係啞視引以自豪、開台以來嘅一大功績，仲言之鑿鑿咁，寫明係「首創」、「直播」，真係唔知畀咩反應佢好。既然講到呢個節目咁響噹噹，有網民就強烈要求重播番九三年以來咁多集；又有網民回憶指，曾經有一集出現撈死魚情節，希望可以重播，睇番呢個高潮位咁話；更有網民認為，呢個可能係啞視最好睇節目添！啞視，你識做啦？
