政壇：政商定格：何喜華獲嶺大頒榮譽院士
嶺南大學尋日頒授榮譽院士畀四位社會知名人士，包括社區組織協會主任何喜華在內。何喜華坦言首次獲得咁高榮譽，差啲感動到喊，皆因佢細個時唔讀書又反叛，雖出身富裕嘅玉石世家，但唔肯繼承家族生意，一直冇諗過有今日嘅成就。佢笑言媽媽受佢感染，非常留意身邊時事，經常聽收音機、睇新聞，有時仲會考番佢轉頭添！
何喜華話雖然母親已屆高齡，仍熱心公益，不時動員身邊人捐出舊衣物回收，搞到佢個寫字樓變咗做雜物房。至於佢遺憾嘅係年前仙遊嘅父親，臨終一刻都未完全認同佢做社會工作。何喜華出咗名係支持特首梁振英嘅「梁粉」，對於新政府嘅工作，佢話有好大期望，佢話上屆政府留下住屋不足、貧窮、社會矛盾等嚴峻問題，冰封三尺非一日之寒，佢相信梁振英會努力解決呢啲社會不公平及深層次矛盾。
何喜華（右）尋日隆重其事着西裝，老友紀文鳳都嚟支持。