政壇:搞搞政:供緊四屋徐英偉怕失業

上任不足十日嘅民政事務局政治助理徐英偉,迅速遞交利益申報。佢報稱有四個物業,當中三個係分布喺加拿大溫哥華出租住宅物業、多倫多供家庭成員居住嘅住宅物業、美國拉斯維加斯嘅分時度假物業,唯一本地物業係同配偶各佔一半業權、位於九龍深水埗區嘅住宅自住物業。嘩!見佢平時唔聲唔聲原來都有幾多磚頭喺手,唔知呢啲係咪叫做「禾稈冚珍珠」呢?

佢接受查詢時話全部物業都仲供緊,又講笑話「失業就好頭痛」,總之佢哋兩公婆會量力而為喎。當問及幾時開始擁有拉斯維加斯嘅分時度假物業,佢話已經擁有一段時間,又話買咗之後一直擺喺度喎。

事實上,佢擁有物業嘅數目,比起部分政治委任官員為多,好似同為政助嘅陳岳鵬,僅擁有港島堅尼地城自住物業,亦多過直屬上司局長曾德成同副局長許曉暉。話時話,佢年僅三十幾歲就有多個磚頭喺手,唔知同佢太太從事金融服務業有冇關呢?

第一手消息請下載on.cc東方互動iPhone/iPad/Android/Windows Phone Apps

設計圖片及對白