政壇：出鏡口快爆粗葉劉耍冧

話說新民黨主席葉劉淑儀前日喺電視台節目中，引述因支持國民教育畀人鬧，話「我喺街有人叫過我×街，有年輕人，係有嘅，一見到我叫我×街。」節目出街後即惹來回響，尋日佢喺社交網站主動致歉。

佢形容當日係「真情流露，一時口快」，謹此致歉，又指經過四年議會生涯同多次選舉洗禮，呢啲通俗用詞實在聽得太多「有啲麻木」，之後又話自己喺議事廳坐喺人民力量黃毓民附近，對方曾經將呢個俗語演繹成普通話嘅「不該」，令人忍俊不禁。葉劉淑儀拉埋其他議員落水，唔知呢啲係咪跌落地執番啲沙呢？

對於佢突然爆粗，網民都有激烈討論。有支持佢嘅網民話，「有人小題大做可以唔理」，另有網民更話勇於承認遠勝巧言強辯，要向佢真心畀個讚。不過，有自稱係葉劉舊下屬嘅網民疑「幫理不幫親」，直言葉劉引述粗口做法有啲「不該」，因為佢着制服唔講得嘅嘢，葉劉竟面對公眾時講喎！