政壇：立會新丁喜食豆豉鯪魚
一罐豆豉鯪魚，可能係集體回憶，亦係共同語言。社聯尋日搞咗個「剩食」活動，安排十位立法會議員試食由剩餘食材煮嘅食物，各人食得津津有味，問真啲，原來啲食材係商戶捐出，唔怪得咁新鮮。
尋日活動一共開六張枱咁多，張張枱嘅食物都唔同，其中立會新丁民建聯梁志祥話，佢老遠由元朗去到深水埗出席活動，見到豆豉鯪魚都覺得分外親切，又話佢嘅選區貧富懸殊嚴重，所以好支持呢類活動。
商界出身嘅蔣麗芸就話，自己平時都有去街市，但就承認係買海鮮較多，又話家人每星期輪流煮飯畀爸爸蔣震食，自己平均每兩個月就要負責煮一次。
