政壇：貪曾遊杭州「恐怖級」擾民

「貪曾」曾蔭權貪心乞人憎事迹不計其數，點知佢離港去杭州都繼續神憎鬼厭。話說貪曾最近跟電視廣播有限公司非執行董事六嬸方逸華去咗杭州，參觀當地嘅書法學院，有內地學生形容，貪曾所到之處「全校二級戒備，恐怖級」，另有人更大嘆校門口百米內都有警察，搞到自己差啲畀扣住，連屋企都返唔到，貪曾嘅擾民程度認真無遠弗屆。

貪曾本月初喺香港出現後突銷聲匿迹，原來係貪威識食到杭州。有網民喺微博爆料，貪曾同六嬸率領香港代表團喺書法學院參觀考察。就網民提供嘅圖片所見，貪曾偕同太太一同參觀，仲見到疑似貪曾二仔嘅身影出現，貪曾則拎住部單反相機，門外有杭州牌嘅警車同救護車，甚至公安、保鏢、保安、武警乜都有喎，認真大陣仗，屬「恐怖級」，認真擾民。

貪曾今次到杭州有六嬸相陪，追源溯本係貪曾同六叔邵逸夫好有淵源，因為即使貪曾○七年九月做咗特首，佢都不避嫌喺酒樓親自餵六叔食燒賣，由此觀之二人交情非淺。