政壇：林大輝轉型攻教育

身為唐營嘅廠商會立法會議員林大輝轉營？當然唔係啦，其實係轉「型」至啱。稍為留意立法會新聞嘅讀者都知，大輝過去四年經常喺立法會就《稅務條例》第39E條提出質詢，但奈何政府答嚟答去都係三幅被，激死佢。再係咁落去唔係辦法，亦冇理由變成單一議題嘅議員，於是諗住轉型專攻教育議題。

問題立場不清

立法會各常設委員會今日就會選出主席，由於建制派已經傾掂數，如無意外，大輝會當選教育事務委員會主席。大輝係一間中學校監，今次似乎有意洗去多年嚟嘅「工業味」，繼續加強自己嘅「教育氣息」，聽日喺立法會大會質詢頭炮就係一條特長嘅國民教育議題，一條質詢分拆成十六條問題。

不過睇完都唔知佢對國教立場係反對定贊成，加上條條提問內容都差唔多，預計政府只會一次過回覆，唔會逐條逐條答咁嘥時間，睇怕大輝要轉型成立法會內嘅教育專家，要學吓點樣問問題一針見血先。

除咗有質詢環節，立法會大會仲有每周兩項嘅「議案辯論」，泛民議員就好好彩喇，頭三個禮拜共六項辯論全部畀佢哋抽中。其實建制派都想飲頭啖湯，尤其係主打勞工議題嘅工聯會，但王國興同陳婉嫻抽三次輸三次，腳頭唔係咁好，反而工黨張超雄、張國柱一矢中的，獲分配時間辯論標準工時同全民退保，再加埋公文袋陳家洛提出十一海難嘅休會辯論，即係立法會頭三個禮拜嘅辯論議題都係泛民主導，幸運之神已經幫咗佢哋，識唔識得運用就要靠佢哋自己喇！