政府車場拍烏蠅 糟蹋資源真敗家

如果商場生意慘淡十室九空，蝕到眼眅眅嘅大業主會點做呢？

唔使講，正常人梗係絞盡腦汁度橋止蝕啦，一係不斷出招吸引人流，一係改變用途另謀發展，總之無理由任得生財寶地丟空養蚊咁敗家o架嘛。嗱，根據呢個邏輯，太一叮肯定，港產官僚係一個極之唔正常嘅大業主，任由生財寶地荒廢糟蹋嘅敗家行為五花八門，最新例子就係政府停車場拍烏蠅！

係咁嘅，運輸署轄下有十四個多層停車場，總共提供六千七百幾個車位，如果經營有道客似雲來，真係豬籠入水o架。只可惜，運輸署好似長期處於瞌眼瞓狀態，大部分停車場使用率長期偏低，居然熟視無睹，闊佬懶理，冇人去諗計改善，於是生財寶地變成養蚊空地。

咁講啦，運輸署其實唔係完全冇做嘢，○七年曾經將七個低用量停車場嘅泊車收費減價吸客，可惜效用唔大，車場依舊冷冷清清。以今年七月為例吖，十四個停車場嘅平均使用率係三成八，當中七個更加只有兩、三成，而中環大會堂停車場更低至一成五！

叮佢個鎯鎯，商場十室九空等如見財化水，政府停車場十位九空一樣係將公帑倒落鹹水海o架咋。○七年減價吸客失敗之後，港產官僚就翹埋雙手，任得多個停車場閒置，任得庫房損失，你話嘞，港產官僚係咪敗家仔吖？

土地係香港最珍貴嘅資源，港府呢頭為咗喺新界東北開疆闢土同人鬥生鬥死，嗰頭任由停車場荒廢，咁算點呀？香港寸金尺土，如果停車場真係無人幫襯咯喎，係咪可以諗吓改變用途更好運用呀？不如改作臨時安置居所，都好過白白浪費吖，等太一叮提醒你哋，家陣輪候公屋嘅無殼蝸牛已經突破廿萬大關嘞，死得你咁暴殄天物！

不過話時話，講起官僚敗家，運輸署應該都唔會覺得孤單咯。審計署次次發表報告，都輕易揪出一班官場敗家仔，產業署啦、食環署啦、康文署啦、地政總署啦……官地物業被空置、被荒棄、被非法佔據嘅例子多到數唔晒。

新政府強調，民生無小事，其實施政一樣o架咋。咪以為浪費公共資源係小事，呢度糟蹋資源，嗰度浪費公帑，就算副身家豐厚一時未敗晒，市民都眼火爆啦，管治仲點會好呀，叮！