SUN世代：孝心化動力 百厭仔變CEO

小時候的郭偉良（Stanley）跳跳紮，坐唔定，考試成績無一科合格，幾乎年年包尾，更曾被學校訓導主任勸喻轉讀特殊學校；但今天，他已搖身一變成為投資公司行政總裁。促使他改變的原動力，全因一份孝心。往後，他希望能將興趣融入工作，為事業開創新的一頁。

「小學嗰陣我好曳，不停喺課室亂跑、大叫、唔肯坐低上堂，總之就係坐唔定，訓導主任話我過度活躍，仲叫媽咪將我轉去特殊學校讀。」猶幸Stanley的母親未有聽從，只覺得兒子有點「百厭」，並相信有日可以教好他。完成小學後，Stanley舉家移民澳洲，雖然澳洲的學校環境較好，但他依然無心向學，終日只愛打波玩樂，令父母十分擔心。

遇上好老闆獲益良多

數年渾渾噩噩的日子裏，Stanley考試科科滿江紅，對於將來，他一片茫然，只想及時行樂；直至升上大學前，母親患上急病，此時他才猛然醒覺：「當時真係好驚，媽咪要即刻做手術，仲有可能會死！嗰刻先知原來我無為媽咪做過啲乜，真係好歉疚。」自此，Stanley發奮讀書，不想母親抱恙還要擔心他的學業：「我唔係醫生，咩都做唔到，惟有做好自己，讀好啲書，唔好要媽咪擔心，就當係報答佢。」

「好感恩，媽咪做完手術後漸康復，我放下心頭大石，但都唔敢怠慢，讀完學士再讀碩士。」○○年，Stanley全家回流香港，他的首份工作是基金分析員，更慶幸遇上好老闆，時刻提點他，令他獲益良多。

Stanley憶述，有次老闆安排他到北京向客戶匯報，那時他剛從澳洲回流一年，廣東話都未學好，普通話更不用說了，故在準備匯報的過程中，壓力很大，每天都想着要讀的文件和稿。在匯報的那一天，壓力終於爆煲，他竟在綵排期間「一走了之」：「當時覺得壓力好大，咩都無諗，將文件掟低就行咗出去。我返嚟之後，老闆只係問咗我一句，『你冷靜完未？冷靜完就繼續，唔好要個客等』。其實當時老闆可以炒咗我，但佢無，之後佢仲教我好多待人處事嘅技巧，令我終身受用。」　　　

工作以外，Stanley自言對地產有情意結，喜歡投資物業，並修讀了多個與房地產相關的課程。前年，他轉職投資公司擔任行政總裁，希望往後能夠開發與房地產相關的投資產品。另外，他亦鍾情室內設計，會親自為物業粉飾一番再轉手：「層樓裝修得靚啲，轉手價錢都高好多，我連屋企嘅裝修都係自己設計，太太都好滿意，仲讚我有天分。」

Stanley's小檔案

學歷：澳洲麥格理大學統計學學士、澳洲新南威爾斯大學金融資產管理碩士

現職：力寶投資管理行政總裁

興趣：打泰拳、室內設計、跑步