政壇：純官林鄭齊齊整番梘
周大福慈善基金及香港社區組織協會共同成立嘅「社區新世界」社區中心尋日正式啟用，目標協助基層脫貧。基金名譽理事長兼新世界發展主席鄭家純同政務司司長林鄭月娥等擔任主禮嘉賓，咁啱今日係「全球洗手日」，所以大家就齊齊洗手同整番梘。
整番梘要將番梘碎加水重塑形狀，純官手起刀落，幾吓手勢就將舊番梘刨碎，佢笑言自己喺屋企煮開飯喎，但佢對住個唧壺就雞手鴨腳，仲唔小心將個壺嘴掉轉咗唧錯隔籬。最後純官做咗塊心形番梘，佢笑稱呢塊係「愛心梘」喎。
身兼扶貧委員會籌備小組主席嘅純官，今次資助逾千萬元捐建呢個位於深水埗嘅中心，佢謙稱自己做得幾多得幾多，借呢個善舉牽頭，鼓勵善長回饋社會。
鄭家純（左）同林鄭月娥（右）親自炮製愛心環保梘。