政壇：葉劉出鏡兩度「爆粗」
新民黨嘅立法會議員葉劉淑儀因為支持國民教育，受到別人粗口對待。佢尋日喺電視台訪問中貫徹佢直腸直肚嘅作風，不避嫌引述該粗口兩次，認真藝高人膽大。
政務司司長林鄭月娥早前接受訪問時感觸落淚，葉劉接受電視台訪問時，唔點名話呢位官員嘅做法鞏固咗自己嘅民望，又承認眼淚可以爭取部分人嘅同情心，但講到捍衞爭議性嘅議題，其實民選議員嘅壓力仲大︰「我喺街有人叫過我Ｘ街，有年輕人，係有嘅，一見到我叫我Ｘ街，可能因為佢以為國教等於洗腦。」
政圈盛傳葉劉獲邀出任行政會議成員已有一段時間，佢話加入行會未知是福是禍，仲事先表明倘喺行會同特首梁振英有唔同意見，佢唔會公開反對佢，會私下游說對方接納自己嘅意見喎！