政壇：建制內訌提早開打

早前嘅立法會選舉中，建制派喺新界東出現內訌，好似公民力量唔再為建仔抬轎，首次自行組團支持龐愛蘭出戰，同建仔嘅「EQ」葛珮帆一決高下，最終敗北，呢個結果仲令到建制派內部競爭白熱化。

龐愛蘭下屆再鬥EQ

建仔今次喺新界東拎到八萬幾票，攞咗兩席，但有黨內核心成員分析，除非繼續增加議席，或者重新劃分選區，否則建仔家陣嘅九席直選議席基本上已到咗頂，唯一可以埋手嘅，正正就係新界東！消息人士分析，要成功喺呢區拎多一席，首要係搞掂家陣完全唔掂嘅將軍澳區，其次要向扎根沙田多年嘅公民力量埋手，盡量搶晒佢哋啲票，咁先至有機會喎！

其實坊間一直盛傳，公民力量喺今次立會選舉自己搖旗參選，事成當然有機會繼續發展，不過一旦落敗，隨時一蹶不振，甚至被「DAB」（音：「嗒」，建仔簡稱）埋。據了解，公民力量至今仍未正式討論未來發展路向，但今次有份參選嘅團隊成員就仍然雄心萬丈，希望下屆再接再厲，爭取由地區攻入立法會。有公民力量創會成員講到明，建仔想吞併佢哋暫時冇乜可能，但蠶食票源似乎就難以避免喇。換言之，EQ同龐愛蘭四年後好可能再火併過。

呢位成員仲估計嚟緊區議會選舉，建仔、公民力量甚至工聯會之間嘅競爭肯定會愈來愈激烈，協調亦愈來愈困難，雖然未必會出現「建制內鬥、泛民得利」嘅情形，但選前嘅「暗戰」同「暗箭」肯定少不免，一啲原本冇建制派成員、甚至夠鐘換人嘅區，肯定成為主戰場，睇嚟區議會選舉「卡位」戰會提早開打嘞！