居民無水用痛斥賊人缺德

【本報訊】舊式屋邨的食水喉多為外露設計，水錶設在單位外的走廊，匪徒容易有機可乘，在走廊閂水掣或上天台閂總水掣，令大廈斷水，再由頂層開始向下「掃樓」鋸喉。有居民大罵偷銅黨無良，「斷水會冇水沖涼洗米，好麻煩o架嘛！」

遭偷銅黨肆虐的屯門四個屋邨，入伙年份由一九七七年至二○○○年不等，當中良景邨、大興邨及山景邨的食水喉，均在各單位外設有水錶及開關，喉管沿門邊外牆入屋，銅喉外包白膠喉保護。二○○○年入伙的寶田邨，則每層有一個有上鎖的水錶房，水喉沿水錶房搭入單位。

區議員盼加強打擊

屯門區議員古漢強表示，過去亦聽聞區內屋邨被偷銅喉，惟至今未有減少迹象，希望警方加強打擊。身兼水務及電器技術顧問的古議員指出，一般的高層大廈包括屋邨，都會在天台設置水缸，經主喉分落每一層，若主喉掣閂上，大廈由頂樓至低層會斷水，低層由約八樓起，因可由地面水管供水，故不受影響。大廈每層亦會有分層水掣，當關上該掣全層便無水供應，最後是每戶的水錶掣亦有開關。有些水喉並非「焊死」，毋須鋸斷，只要用士巴拿便可扭開。

對於偷銅黨肆虐屋邨，良景邨居民麥太表示：「唔怪得近日見到有人古古怪怪，都唔知係賊定係便衣警做嘢，好彩自己間屋嘅水喉冇畀人偷，如果唔係真係麻煩，冇水沖涼洗米。」

另一名居民黃太說：「斷水偷水喉，真係離譜，會搞到居民好唔方便，都唔明點解咁缺德，啲嘢好值錢咩！」