樓市高處不勝寒 奈何拓地寸步難

大鑊！魅力都市淪為怪異之城，唔通香港真係撞咗邪？

樓市長升長有，愈來愈瘋狂，連運輸及房屋局局長張炳良都話「奇怪」。咁又確係幾怪嘅，樓價同租金雙雙升破九七年水平，但實體經濟其實唔係咁掂，市道麻麻，樓價乾升，你話怪唔怪吖。張炳良提醒市民，泡沫風險增加，千祈咪「恐慌性買樓」喎。

叮，風涼話邊個唔識講吖，家陣樓價好似火箭咁飆升，高處未算高，愈遲上車代價愈大，唔恐慌就假。再講吖，唔計前朝政府嘅招數，今屆政府上台以來已多次出手為樓市降溫，但效果就適得其反，招數愈多，樓價升得愈快，問你服未。

係人都知，樓價上升主要因為供求失衡，穩定樓價最有效方法就係增加供應。問題係，增加供應唔係講吓就得，由開發土地到房屋落成，最快都要三、五年，甚至十年八年，遠水點樣救近火喎。

再講吖，就算供應多咗都未必止到咳，如果供應量增加追唔上需求上升，到頭來咪又係嘥氣。唉，樓價高不可攀，無殼蝸牛望樓興嘆，惟有寄望公屋。呢嗱，家陣公屋輪候冊出現兩種現象，其一，申請人數已經衝破二十萬大關，其二，新增申請者近半數屬非長者單身人士，其中好多係大學生，甚至連碩士、博士都有添。

話時話，公屋申請者年輕化已經成為結構性問題。租金年年加，負擔愈來愈重，樓價歲歲升，置業安居夢想愈來愈遠，無殼蝸牛除咗申請公屋之外，仲有乜嘢辦法吖。弊在公屋供應量有限，輪候冊多咗大批年輕人，勢必拖長整體輪候時間，最終受害嘅咪又係嗰啲真正有需要嘅家庭。

點樣解決呢個問題？講到底都係要增加土地供應，加快興建公屋，可惜香港愈來愈政治化，新政府動輒得咎，增加土地供應邊有咁易吖。呢嗱，新界東北發展計劃本來可以為十五萬市民提供安居之所，解決唔少房屋問題，點知竟然被扣上「割地賣港」、「富豪雙非城」等大帽子。政客呢頭叫政府增建房屋，嗰頭又千方百計阻撓發展新界，神係佢哋，鬼又係佢哋！

今時今日唔止輪公屋嘅人多，搞搞震嘅無聊人仲多，「港式文革」遲早累死香港嘅咋。計太一叮話齋，房屋問題點解決，香港何去何從，除咗政府要諗計，七百萬市民同樣要反思，叮！