行行出狀元：興趣變成工作 機癡成師

小時候，打機至通宵達旦，捱罵少不免，但當「打機叻」都可以寫在個人履歷上，成為「搵食」技能時，打機與不上進之間的等號又可否消除？近年，各大遊戲機公司興起聘請80後、90後，訓練他們成為「打機達人」，然後走到街頭教市民打機，宣傳新款遊戲機或遊戲。打機，從此又多一個理由。

「你好呀，有冇興趣試吓我哋部遊戲機呢？」Vanessa與Harry穿起整齊制服，走在銅鑼灣街頭，拿着手提遊戲機向絡繹不絕的行人問詢。一名小女孩停了下來，Vanessa即向她遞上遊戲機，然後站在身旁看着她肉緊地玩起來，「撳呢個掣係跳起，避開啲陷阱，撳呢個掣就可以轉角色……」

Vanessa與Harry都是學生，但每當周末及假日都會變身成「打機達人」，在鬧市或遊戲機店教別人打機。成為「打機達人」還不足半年的Vanessa自小愛打機，亦是cosplay愛好者，經常於不同場合扮演動畫或遊戲角色，因此認識到遊戲機公司職員。「有次佢同我講，公司有個program，想請啲鍾意打機嘅後生仔，我覺得幾得意，就答應參加」。

而自認「機迷」、家中有上百款電子遊戲的Harry，則是年中在遊戲機公司的社交網站上，看到招聘訊息後報名，並於一眾參加者中脫穎而出。「由細到大，都幻想可以將打機呢門興趣變成職業，估唔到有機會成真」。

唔識過關 客人教返轉頭

Harry自小愛打機，教人打機理應全無難度，但事實並非如此。「我以前只係玩開格鬥類遊戲，其他射擊、運動類等都好少玩，但要教人打，就要對所有類型遊戲都有最基本認識」。在走上街頭前，「打機達人」需要受訓，學習各種遊戲的操作，更要考筆試。原來，打機都有堂上。

當打機變成工作時，樂趣依然。能練習多種從未玩過的遊戲，更能優先試玩尚未正式推出的遊戲。即使工作期間，亦有不少趣事，「試過唔識點樣過關，要被教嘅客人教返轉頭，又試過畀貪玩嘅外國人扮搶機，大家跑足兩條街」。

「相對於以前做過嘅工，好似補習老師、文員咁，呢份工真係有趣得多！」工作趣味十足，他們希望繼續做「打機達人」，Harry更想正式加入遊戲機公司，在「打機界」發展。

各大遊戲機公司近年接連推出多款新遊戲機，令「打機達人」的需求甚為殷切。業內人士估計，現時全港約有百多名「打機達人」，各公司會按項目聘請，主要於星期六、日及假日工作。工作表現出色者，除可獲持續工作機會外，更有機會被邀請加入遊戲機公司，成為全職員工，負責產品推廣。

入行之路

1.參與並成功通過遊戲機公司的招募。

2.上堂學習不同遊戲的操作方法，通過筆試考核。

3.成為「打機達人」，於街頭或遊戲機店教客人打機。

我有Say

Vanessa：「打機係一樣好開心嘅事，教人打機就等於將快樂分享畀其他人。」

Harry：「由細到大都鍾意打機，估唔到興趣可以成為職業，好似夢想成真。」