SUN奇古怪：Sun潮語：【江南Style】

正所謂一命二運三風水，時來運到沖天飛，尤其係做娛樂界。有人可能做足一世都係要做啲二打六two hit six呢類小角色，又或者突然把握到一個機會，一嘢彈起吐氣揚眉，好似最近電視劇人氣爆燈嘅角色「蘇基」，造型鬼五馬六不男不女，但係又鬼死咁受觀眾歡迎！飾演呢個角色嘅資深演員古明華，真係自己突然紅咗都唔知咩事！同樣估佢唔到嘅，仲有最近喺youTube點擊率達到3億4千萬嘅「江南style」！

「江南style」嚴格嚟講唔係潮語，而係一首潮歌，但之後極之可能成為潮語，可以講係一個準潮語。「江南style」係由韓國歌手PSY（朴載相）主唱，首歌係屬於Hip-Hop節奏，歌詞大約關於首爾江南區嘅韓國男人嘅特色，呼籲全國女子都要鍾意「江南style」嘅男人，其實係一首溝女歌。歌曲係由幾個主要節奏，加幾句歌詞不斷repeat再repeat，相當容易入腦。最搞笑係個MV，片中已屆中年兼且具備谷德昭身形嘅PSY，不斷地反覆跳着自創嘅騎馬舞，動作相當滑稽，有人甚至覺得難頂！但弔詭嘅係如此難頂竟然令全球瘋狂！

「江南style」推出短短幾個月，全球各地已爭相倣效同學習「江南style」嘅騎呢舞步，好多人甚至自行模仿PSY，不斷二次創作「江南style」，並自拍成短片放上youTube。現時已有數以千計，嚟自不同國家嘅模仿版本，有啲甚至將歌詞改成本國語言，內容亦五花八門，「江南style」真係唔止一個style！甚至有個版本，係一班美國海軍在基地一齊跳騎馬舞，我諗連原唱者PSY自己都始料不及。

其實「江南style」可以紅遍全球，除展示咗互聯網嘅威力外，全球網民自己嘅二次創作能力都功不可沒。所以，如果好似最近香港某唱片公司，仲喺度繼續打壓二次創作，連網民改首歌悼念海難都要拉要鎖……香港嘅所謂創意工業，真係死得！