政壇：搞搞政：長毛入十個會挑戰難度

「長毛」梁國雄講嘢雖然聲大大，但喺立法會卻係一人黨，因為社民連喺立法會得一席，而呢啲一人黨缺乏黨友支援，面對十八個專責討論唔同政策範疇嘅事務委 員會工作時，難免顧得呢個顧唔到嗰個，所以佢哋各有策略，長毛今屆就搏到盡，報名參加十個委員會，一心多用，向高難度挑戰。

長毛參加嘅十個會，交通、房屋、政制、保安、教育、司法樣樣都有份，佢咁大貪，容乜易撞期o架？如果遲吓再有啲調查委員會，佢真係分身乏術囉。希望長毛唔好十項全能變三分鐘熱度，即每次開會三分鐘、發言完畢就掟嘢走人啦！

同長毛一樣喺新東直選跑出嘅單丁議員范國威就錫身好多，只係加入咗交通、發展同環境三個事務委員會，專注新東居民最關心嘅交通問題、新界東北發展計劃同將軍澳堆填區問題，數目連長毛嘅三分一都冇。另外，仲有八名議員報名加入咗八個委員會，抵佢哋攞勤力分。