政壇：工聯阻工黨攞頭威

新一屆立法會履新後，嚟緊呢個禮拜三就會舉行首次正式會議，議員質詢環節即刻爆出工聯會同工黨交手嘅戰事，事緣當日工黨抽中提議案，並由張國柱提出立法規管工時嘅辯論，據悉，一樣以勞工同基層為主要服務對象嘅工黨同工聯會早已計劃鬥快抽到質詢檔期，喺標準工時打響第一仗，點知工黨得米，工聯會唔想風頭盡失，立即派出勞工界新丁郭偉強就原議案提四項修訂，由設立專責委員會到加強教育都講埋，攔截張國柱之餘，仲大有騎劫議題之勢。

郭偉強嘅修訂雖然保留咗張國柱原議案嘅四十九個字，但就擺喺最尾，修訂仲加長原議案約八倍，內容詳盡，講晒要諮詢工會、向勞顧會匯報甚至加強透明度等，比張國柱嘅建議深入得多，呢個立會新丁真係做晒功課。

商界與勞工界角力場

講到尾，標準工時同最低工資都係同香港市民息息相關嘅勞工議題，主打勞工事務嘅政黨同團體梗係要穩佔呢個舞台同話語權，而商界議員又要藉此同勞工界過招，所以張國柱提呢個原議案就招嚟七名議員提修正案。

譬如同樣擁有商界背景嘅議會新丁建仔蔣麗芸同新民黨田二少，佢哋分別要求港府提交相關研究報告，畀委員會同公眾有相對嘅討論空間，以及要求當局先就標準工時向各界諮詢，以達共識。

而之前已承諾入到議會唔會渾水摸魚嘅公共專業聯盟梁繼昌，亦可能因為要顧及專業界別選民嘅意見，喺修正議案入面加入要求當局展開公眾諮詢嘅工作，同埋要求當局延至下個立法年度至提交規管工時條例草案嘅建議。