醫學美容亂象多 規管執漏豈能拖

唔少醫學美容院成日向顧客推銷美容針，話可以由醜變靚喎。其實，如果世上真係有咁神奇嘅回春妙藥，最需要補番一針嘅唔係各位貪靚女士，而係美容行業就真！

嗱，美容業無監無管，亂象多多，真係極之需要嚟一次大執漏o架。以前就話公立醫院事故頻生，草菅人命，家陣醫學美容一樣搞出人命，諗起都得人驚。

好嘞，既然大家都認為發生今次人命事故，皆因法例漏洞多多，醫學美容缺乏監管所致，咁當局係咪應該即刻拎起支美容針，狠狠拮落去，執番靚行內嘅經營亂象呢？冇錯，當局係就係準備施針落藥，可惜，呢劑針藥仲流過流口水。

當局宣布成立督導委員會，檢討私營醫療機構嘅規管架構，將明確界定高風險醫療程序，區分普通或醫學美容療程。食衞局局長高永文係咁講嘅，委員會需要一年檢討，其後再為規管建議諮詢公眾，再之後先至展開立法程序……大佬呀，醫學美容家陣處於無王管狀態，行內亂象叢生，良莠不齊，等到你檢討完、諮詢完、立埋法，隨時要三五年，期間唔知又會發生幾多事故，又有幾多市民受害咯。

咁講啦，現時法例殘缺，靠衞生署、海關同消委會監管美容業，根本係無牙老虎，形同虛設。當局唔火速向行業亂象開刀動手術，反而搞出個長達幾年嘅檢討及立法，留下規管空窗期，唔通要再次搞出人命，當局先至識驚？醫學美容問題係急病重症，根治刻不容緩，當局落藥要等幾年至可能見效，荒唔荒謬啲呀？

叮佢個鎯鎯，呢啲咪叫急驚風遇着慢郎中囉，事關市民生命健康嘅問題都慢條斯理，軟手軟腳，唔怪得叫佢哋管理樹木就更加粗枝大葉，漫不經心咯。呢嗱，呢頭醫學美容無王管害死人，嗰頭又蟲蛀殘樹壓死人，睇嚟港產官僚真係急需一支極速美容針，認真執番靚施政殘樣！

一句講晒，美容奪命淚漣漣，規管豈容拖幾年。過氣特首曾蔭權爵士為咗所謂醫療產業嘅春秋大夢，明知醫學美容問題多多都扮睇唔到，卒之搞到烏煙瘴氣，害到市民雞毛鴨血。新政府唔好重蹈覆轍嘞，快快幫醫學美容行業消除瘀血，排出毒素，咪靠害市民呀，叮！