SUN世代：私房酥餅啖啖孝心

一口酥餅，連繫兩代母女情。80後吳惠茵自小立志成為化妝師，但事業剛起步，母親卻打算結束經營多年的私房菜。眼見家族手藝即將失傳，「孝順女」毅然放下化妝事業，走進一竅不通的做餅世界，決心承傳母親一雙巧手。她隨母學做餅，再將私房菜轉型，開設餅店，將傳統酥餅發揚光大。只要細味，便能嘗出酥餅中的一片孝心。

早上六、七時，黃竹坑一個做餅工場經已燈火通明，幾名女士身穿圍裙，拿着粉團左搓右搓，再將材料平分到麵粉上，其中一人就是吳惠茵。親自做餅，只因家族食譜不外傳，「媽咪份食譜得我知，所以每朝都要親自去工場調配餅漿。」這位家族酥餅「傳人」不止懂做餅，更曾為無數新娘裝身扮靚，是位專業婚宴化妝師。

「由細到大，我都唔係讀書材料，反而對化妝好有興趣，一心諗住做化妝師。」在加拿大高中畢業後，她隨即返港報讀化妝課程，實踐童年夢想。其後她又遠赴台灣、日本進修及鑽研化妝技巧。「返到香港就開始接freelance做，專門做新娘妝。」原視化妝為終身事業的她，因母親一席話，扭轉了這個夢。

一○年年底，半退休的母親打算結束私房菜生意，又不甘捨棄多年心血，於是「試探」兩位女兒：「你哋有無興趣接棒呀？」姐姐拒絕了，妹妹吳惠茵親情至上，一口答應。「如果我唔做，媽咪嘅手藝就會無咗。自問無本事接手私房菜，但有個客食完媽咪整嘅餅，話可以食番以前嘅味道，聽到嗰下好感動，心諗整餅應該易啲上手，就應承幫手搞酥餅生意。」

接棒後，她開始學做餅，卻曾因急進不聽母親言，結果吃虧眼前。「最初學做餅底，諗住用機械可以加快生產速度，點知做出嚟個味差好遠，反而用媽咪教嘅傳統方法，用匙羹同手一齊捏，先係最好味。」

吳惠茵非讀商出身，坦言做生意比做餅更難。「我真係一張白紙。搵舖、訂貨、請人、宣傳……咩都唔識，又唔敢同媽咪講，壓力好大，偷偷喊咗幾次。」有次準備出貨時，發現不夠包裝罐，只能暫停出產。「嗰次係一個好好嘅教訓，令我學識一定要做足預算，先至唔會做蝕本生意。」經過三個月的堅持和努力，她終遇上第一個大客，一口氣訂購一千罐酥餅，令她信心大增，至今已開有五間分店。

對她而言，做餅與化妝一樣，滿足感同樣來自別人的喜悅。「如果個妝化得靚，新娘會好開心，正如啲客食到好味嘅餅一樣。」訪問當日她鼻敏感發作，但提到一班「食客」，她總會抖擻精神。「我唔病得o架，病咗就無人整餅。」這個家傳秘方會延續至第三代嗎？她笑言﹕「可能畀我個女啦，如果有嘅話，哈哈﹗」

吳惠茵小檔案

現職：Lily's Pastry麗姐私房酥餅店創辦人

學歷：加拿大Richmond International High School and College高中畢業

婚姻：未婚