政壇：政商定格：誠品轉慢熱朱曦冇有怕
唔經唔覺，台灣「過江龍」誠品書店喺銅鑼灣嘅香港首間分店開咗已兩個月，由當初盛況空前不夜天，到依家似乎熱潮已過。不過台北經濟文化辦事處處長朱曦前日出席一項「雙十」活動時，就力撐香港誠品做得好，認為依家只係過渡期，相信港人需要慢慢消化同建立閱讀文化，唔擔心做唔住。
朱曦來港都已一段時間，問佢最鍾情邊種香港美食？佢好快就答話係深井燒鵝同埋廣東粥。同場仲有首次以官方身份來港嘅行政院陸委會副主任委員張顯耀，佢話仲未去過香港誠品，有機會會去參觀吓。之前已來港多次嘅佢仲話，最鍾意食港式菠蘿油同埋飲老火湯，仲因此肥咗個碼，要勤做運動收身。
朱曦（右一）話唔擔心誠品喺香港做唔嚟，左一及左二為廠商會常務會董戴澤良及太太羅台秦，右二為朱曦夫人。