政壇：政商定格：專資會考察團新疆「探油」

香港專業及資深行政人員協會上月尾拉隊考察新疆維吾爾自治區，又參觀塔中油田。一行專資會團員跟隨立會議員嘅團長兼專資會會長Tony謝偉銓出發，由極地探險家李樂詩任副團長，同行仲有創會會長Samuel容永祺、前會長胡曉明、副會長黃偉雄同理事Susan楊素珊等。

新疆景點多，遊完天山天池後，團友更深入中國最大沙漠塔克拉瑪干沙漠，行程緊湊。嚟到新疆，都有香港人足迹，佢就係前律政司司長梁愛詩嘅哥哥梁狄剛，依家喺當地擔任石油地質專家，勘探石油頂呱呱。油田範圍有唔少一級機密，但梁生人面夠，有佢帶路通行無阻。

Samuel嘅好友克然木爸吾東住喺庫爾勒市，佢嘅家居裝修金碧輝煌充滿中東色彩，華麗如王宮，團友不禁嘩然。Susan話單係飯廳張長枱，坐滿三十幾人都唔覺逼。主人家好熱情，擺滿一枱美食及水果，新鮮無花果、哈密瓜、提子等任食唔嬲，仲請嚟甜美新疆美女載歌載舞。