政壇：搞搞政：沙田友EQ恨做中大校董

上屆五名身兼香港大學校董嘅立法會議員分別係涂謹申、李卓人、葉國謙、石禮謙同葉劉淑儀，中文大學方面係陳克勤、張宇人同黃毓民，八人之中有三人已表明唔會連任。

克勤仔上屆當選後因為一句「try my breast」而畀中大學生寸爆，質疑中大唔需要一個連簡單英文都講唔正嘅校董。今屆佢決定將校董一職交畀新丁黨友建仔嘅EQ葛珮帆接棒，原因係做一屆就夠，同擔心會畀班中大生玩多次無關喎。EQ承認有心做中大校董，因為自己係沙田區議員，又做過多年中大工程學院某諮詢委員會，希望透過校董身份改善校政。

之不過，石禮謙同張宇人異口同聲話做多四年絕對冇問題。其中剛當選財委會主席嘅張宇人，直言有人或會質疑佢身兼多職會力有不逮，但佢話自己做中大校董非常稱職，加上中大校董會多數喺中環開會，由立會行過去都算方便，相信唔會影響議會工作。