政壇：陳繁昌出城撐鳳凰午宴
尋日係每月一度行政會議鳳凰午宴，特首CY梁振英、多名高官、行會成員、剛宣誓就任嘅新一屆立法會議員同大批政商界名人都有赴會，當中包括好耐冇去過嘅科技大學校長陳繁昌。佢直言科大位處偏遠，如無要事甚少到中區走動，因此已有一段時間冇出席行會午宴，但為咗跟新任特首CY同新一屆行會成員聚首，點忙點遠都要「出城」一次。
大半年前CY仲係行會召集人時，鳳凰午宴係由佢主持，今次就變身座上客，由新任行會召集人林煥光介紹招呼，喺午宴上仲就香港最新經濟狀況發表演說。林煥光透露，佢以往擔任政府官員時，都經常出席行會午宴，見慣CY點樣做嘢，依家調換角色，做起嚟完全唔覺得陌生。
行會召集人林煥光（右）迎接特首梁振英。
科大校長陳繁昌罕有現身行會午宴。
