公屋人龍長 博士也瘋狂

古人話，書中自有黃金屋。今時今日呢句話未必啱使咯，更貼切嘅講法應該係：「書中只有輪公屋！」

唔係咩，樓價租金起勢飆升，寸金難買尺土，就算飽讀詩書，學歷幾高，都未必負擔得起一個豆腐膶蝸居啦。所以咯喎，排隊輪公屋就變成好多飽學之士「安身立命」嘅唯一選擇嘞。

最新數字顯示，公屋輪候冊申請宗數直逼十九萬大關，當中非長者單身一族嘅申請人數跳升至八萬八千人；其中未滿三十歲嘅又佔咗四萬六千人，超過一半具專上或以上程度學歷，部分仲擁有碩士或博士銜頭添。唉，以前學歷唔高搵錢唔多，就話迫於無奈輪候公屋啫，家陣高學歷一族一樣買唔起樓、租唔起樓，對呢班無殼蝸牛嚟講，係咪書中只有輪公屋吖！

其實，大學生未畢業就申請公屋，已經唔係新聞，之但係搞到碩士博士都落場爭埋一份，僧多屋少，輪候冊條人龍咪隨時長過長江？公屋係一種社會福利，原意係幫助基層家庭解決居住問題，依家連碩士博士都唔執輸，簡直匪夷所思。所以話，書中只有輪公屋呢個社會怪現象，正正係前朝政府房屋政策一塌糊塗嘅寫照。土地供應長年不足，樓價租金脫韁狂升，年輕人焦急無奈，咪惟有爭輪公屋囉，總好過住劏房提心吊膽，或者露宿街頭忍受風吹雨打吖，係咪！

土地及房屋供不應求，搞到大批市民上無片瓦遮頭，下無立錐之地，咁點算呢？無乜點算嘅，快快趣趣開發土地囉，興建房屋囉。貪曾政府就話死蛇爛鱔踢極唔郁啫，新政府肯做嘢o架，本來打算落實新界東北發展計劃，提供五萬四千個住宅單位，為十幾萬市民解決居住問題。但可惜吖，今日香港唔止輪公屋嘅人多，搞政治鬥爭嘅人仲多，成個社會政治化情緒化，加上有人居心不良，興風作浪，煽風點火，有關計劃阻力重重，隨時爛尾收場都似。

叮佢個鎯鎯，無良政客同不良傳媒為咗搞政治鬥爭，將老百姓福祉當政治籌碼，最終受害嘅必然係普羅市民。不過話時話，新政府嘅表現同樣令人失望，上場三個月來，未見「穩中求變、適度有為」，只見進退失據，亂上加亂，點可能唔令人搖頭嘆息吖！

「公屋人龍長，博士也瘋狂」，點講都唔係一種健康嘅現象，希望政府盡快諗諗計，亦希望政客唔好阻頭阻勢，叮！