SUN熱辣：帶手機空盒海關全扣起
深圳海關除嚴打水貨客攜帶智能手機過關外，連新、舊智能手機盒也列入為嚴打行列。
本報記者就直擊一名攜帶多個智能手機盒的水貨客，在羅湖過關時被深圳海關截停，被扣起所有智能手機盒。
記者日前在上水港鐵站，見一名水貨客將相機及智能手機等產品的盒、機分開，再分派給其他水貨客，其中一男子帶十多個空盒及其他日用品過關，該名男子在羅湖過關時，被內地海關截停及查問十多分鐘。
其後他雖獲准入境，但所有盒都被扣起，他步出口岸後，即大聲致電同伴通報行動失敗：「真係黑仔，拖咗十幾個吉盒過關。以為唔會有事，點知過海關時，畀位關員質問我做乜帶咁多吉盒過關？係咪有同黨已經將啲機攞咗過關？我當然話唔係啦!但佢哋唔信，要扣起所有盒，要我返港時才可以拎番，仲要我畀存倉費，呢鋪真係蝕晒！」
分拆機盒連環圖：接貨
水客於落馬洲港鐵站接過平板電腦。
拆盒
一人將平板電腦拆盒，同伴將貨放袋裏。
過關
兩人分開過關，離開深圳福田口岸。