次世代新活圈：妝模．作樣拍上Blog

「有好嘢就公告天下！」不過，新一代社交平台何止限於面對面，Instagram、Facebook、Youtube獲無數年輕人所追捧。高瀏覽量吸引新世代組成短片Blogger（博客）大軍，將飲食見聞，化妝心得統統記錄低，編成網誌，線上盡告四方好友，高喊公諸同好，無分你我。

「既然學過化妝，唔同人分享咪好嘥？」Cherrie正在大學修讀時裝課程，曾當過化妝師，但成為模特兒後，滿腹技巧無用武之地，於是去年八月自製教學短片，在網上分享平台發布。

「用影片比文字教化妝，大家更易明。自己同朋友用開Facebook、Instagram，Youtube就最多人睇，咪拍完放上去，有好嘢就梗係愈多人知愈好。」

網民追捧 愈拍愈起勁

Cherrie每次上載短片即引來各地網友訂閱留言，本來互不相識，卻漸組成新圈子。網誌專頁已成為她與網友們聊女孩子經的快樂園地。Cherrie說：「佢哋成日問我幾時上載，仲有人私下留言問我化妝技巧，好開心，原來會有人欣賞。」

網友意見更成為她改變的動力。Cherrie說：「我講嘢有好多懶音，不過一直無動力去改，直至佢哋留言話聽唔明，我就決心去改。每次寫定份稿，諗多幾次先錄，希望改善到。」年半以來，Cherrie愈拍愈起勁，製作日漸嚴謹，博客與網友交流激勵，彼此都變得更美。