政壇：政商定格：李楚洳「相中畫」撞出創意

賽馬會鯉魚門創意館尋日對外推介「青苗計劃」首位新銳畫家，佢就係就讀香港大學藝術系三年級、中華廠商聯合會副會長李秀恆女兒Samantha李楚洳。Samantha擅長以黑白相片做畫布，然後繪上諷刺社會萬象嘅油畫，無論色彩或構圖意念，都具備威力十足嘅衝撞效果，難怪畫壇前輩兼老師巢錫雄都盛讚佢潛力無限。

Samantha話受到爸爸熱愛攝影嘅影響，佢都鍾意旅行時帶埋長短鏡去影相，舊年暑假全家人去肯尼亞睇動物大遷徙，每日嘅行程就係坐喺架車度，喺車頂天窗伸出長鏡頭捕捉動物一舉一動，呢次旅程令佢興起以動物為主題嘅P ON P（Painting on Photo）創作。佢創作嘅逾九十幅「相中畫」，將喺下月二日假香港大會堂展出，同場仲有創意館駐場藝術家劉偉基同司徒建嘅陶瓷作品。