政壇：徐英偉陳岳鵬立會派片
新一屆立法會議員尋日宣誓，成功冧莊做民政事務局局長政治助理嘅Caspar徐英偉同由特首辦轉戰政制及內地事務局做局長政治助理嘅Ronald陳岳鵬都有現身。咁落力，唔通有秘密任務？
Caspar話第一日就落立會，主要係認識啲新議員，但就唔係問議員拎電話，因為政府一早就有，佢落嚟係要派卡片畀班新議員，介紹自己之餘，亦畀自己個電話號碼大家，等班議員第時有事可以打電話畀佢喎。
至於Ronald落立會嘅目的亦大同小異，第一時間周圍派卡片外，亦特別想同班新議員混熟啲。Ronald所屬政策局主理大量敏感同受爭議議題，唔通咁快就有嘢要同班議員摸底？佢笑言政治每樣嘢都好迫切，叫大家唔好諗咁多喎！
徐英偉去立法會「派片」。